中文輸入法

今日重新發現粵拼輸入法。

唔知點解，似乎人人都識用倉頡或者簡易、速成打中文，但係我硬係覺得佢哋好難學，同埋唔合邏輯。我平日打中文都係用漢語拼音輸入，因為基本上唔使學新嘅嘢就用到，而且有 Windows IME，唔使裝新嘢喺部電腦度。

我知道咗粵拼喱樣嘢好耐，但係一直都無興趣用。原因非常非常簡單，就喺唔鍾意佢用"J"而唔用"Y"。但係我始終無辦法用漢語拼音打嗰啲口字邊嘅香港字，成日喺網上 copy and paste 都唔係辦法，諗吓諗吓，唉，不如都係用粵拼啦。又唔使點學，淨係要習摜唔用"Y"而用"J"之嘛，啲韻母又同平日用嘅差唔多，將就將就咪得囉。

咁今日亂咁上網，去到一個我平日都有去嘅網頁，發現有一個我不嬲到無發覺到嘅輸入法工具，乜都唔使安裝，連紅蜻蜓都唔使就可以用粵拼輸入法打嘢，好開心啊。而家就係用緊粵拼打喱篇嘢嘞。

搵到咁筍嘅嘢，我梗係即刻廣報親朋啦。有人以前講過唔識打中文，今勻都應該幫到佢喇啩。

不過而家可以咁容易咁打中文，我都有小小擔心我啲普通話會退步。