水浸

今日放工返到屋企，見到波光粼粼。原來一個廁所水箱漏水，浸咗個廁所、三間房同一小部分廳，水深兩吋，拖鞋浮浮吓。有燈，但fuse跳哂。我連地拖都無，於是手痛都無辦法，用垃圾鏟拂水，攪咗一排都無乜進展，然後管理處有人敲門，因為樓下滲水。渠哋影完相之後就攞部機來同我吸水，未吸完已經接到call話又有個單位係咁。今朝停過鹹水，恢復鹹水就變成咁。成個場好似打完仗咁，好彩呢幾日天氣乾燥。

啱啱攪咗史上其中一次最大嘅丟鞋行動，地上全部連着緊嗰對都丟哂。但更可怕嘅係：我仲有幾對未着過嘅返工鞋響櫃頂。手更痛，唔知聽日返唔返到工。

唔知要賠幾多畀樓下呢。