老貓燒鬚

響首爾最後一日，下晝想去一個旅遊點，叫 Provence Village，網上資料話可以響合井地鐵站2號出口搭2200號巴士去。地鐵站出口有巴士站，但無2200個牌，四圍都唔見。於是就睇巴士站啲告示，當然全部韓文。但見到一張寫住“200，2100，2200” 嘅告示，下面係"2  번 출구 → 1 번 출구 "。韓文我唔識，勉為其難試下讀啦，讀出來好似日文同普通話混合嘅“2番出口→1番出口”，咁就明嘞，巴士站由2號出口搬咗去1號出口。但如果唔識讀韓文，咁點算？你話響韓國旅行幾難呢。

跟住上咗巴士又唔識落車。旅遊資料寫中英文我識睇無用，當地用韓文。雖然記住落車個站點讀，但又驚自己搞錯，最後都係用英文問司機。落得車來，公路得我一個，有啲驚。跟住網上資料，響無乜人嘅路行咗十幾分鐘，真係到咗一個地方，基本上就係響山旮旯將啲屋油成五顏六色、開啲舖頭、播啲法文歌、噴啲薰衣草香味，就叫做南法普羅旺斯情調。後悔得我吖。