風扇

前晚睡房嘅風扇壞咗，響無空調嘅情況下渡過咗悶熱嘅一晚（實情係我唔記得咗間房其實係有冷氣嘅），尋晚去買風扇。我用咗tower fans 好多年，但唔知點解尋晚揀咗部傳統大圓頭一隻腳嘅風扇，大概同個品牌(Tefal)同價錢（六百幾）有關。買完自己托返屋企，老實講唔算重而且唔係行好耐，不過我年老力衰，都幾用力。之後重要砌把風扇出來，但其實我自己照顧自己咁多年，砌傢俬同電器都幾叻，而且細個時經常洗風扇，對構造相當了解。於是攞哂啲配件出來就開始砌，由底砌起，雖然見唔到說明書覺得有啲奇怪，但完全無難度。最後裝個大頭，先發覺說明書夾響入面，但我都已經砌好嘞。

夜晚開住新風扇瞓覺，果然風力強勁超級寧靜，幸福指數飆升。日日營營役役勞勞碌碌，呢類小確幸其實好重要。新風扇有遙控器，但只可以控制開關同風力，風扇頭嘅轉動要靠最傳統嘅人手機械式開關，我覺得奇怪，唔知呢個係因為Tefal 設計落後，抑或係出於對傳統大頭風扇嘅安全考慮。